Bāng-lō͘ téng ê Kha-jiah

這是我在「BlogBlog 同樂會 - 2026 年 11 月」的投稿文章。本月主題是「部落格文章（與他們的產地）」，由 資工小廢物 - JN 主持。如果你有自己的部落格，歡迎一起來參加！

M̄ chai beh án-chóaⁿ khí-thâu

1

Siá bûn-chiuⁿ beh chhòng siáⁿ? M̄ sī khó-chhì hông pek teh siá. Mā m̄ sī bē chheh thàn chîⁿ. Iā m̄ sī kan-taⁿ siá hō͘ ka-tī khòaⁿ ê pì-bi̍t. Tian-tò khǹg tòa bāng-lō͘ téng, hông bián chîⁿ khòaⁿ liáu-liáu. Án-ne kám ū-iáⁿ chhù-bī?

2

Bat thiaⁿ lâng kóng, siā-kûn mûi-thé heng-ōng liáu-āu, chi̍t-kóa lâng tian-tò piàn kah khah bô ài tòa bāng-lō͘ hoat-piáu ì-kiàn. Ū--ê kiaⁿ lâu kha-jiah; ū--ê kiaⁿ bô lâng chhi̍h chán chin kiàn-siàu; ū--ê sī iōng kah sim-lí phòa-pēⁿ, bô châi-tiāu koh pho͘ bûn--a.

3

Lūn-chin góa m̄ sī 1 ê kut-la̍t ê lâng. Nā thang lám-nōa, thái tio̍h bô-êng chhih-chhih.

Kóng-kó͘

Kok-hāu-á — Xuite

Kóng-khí Blog, siāng-chá kok-hāu-á tiān-náu-khò ū kà. Tiān-náu khò-pún m̄ nā kà án-chóaⁿ chò khah-phìⁿ. Koh ē kà cháiⁿ-iūⁿ chhòng ka-tī ê Blog. Hit-chūn khò-pún sī kí Xuite chò lē, só͘-pái pan--ni̍h ta̍k ê ha̍k-seng lóng ū 1 ê Xuite kháu-chō. Thâu-khí-seng kà siáⁿ-hòe chá tio̍h bē kì--chit--ah. M̄ koh góa iáu ē kì teh Xuite ē-tàng liap 1 ê lâng-hêng, m̄-bián khǹg chin-chiàⁿ ê siòng-phìⁿ. Chhan-chhiūⁿ chóa-ang-á(paper dolls) án-ne, ē-sái kéng kah-ì ê saⁿ-á-khò͘ lâi chhēng. Thâu-mo͘ beh bô kâng siat-to͘h mā chāi lâng ōaⁿ. Kan-taⁿ liap hit-hō ang-á --chhut-lâi, tio̍h thang liáu kui chiat tiān-náu-khò.

Kok-tiong — Bô-miâ--ê

Āu--lâi Bô-miâ--ê(Wretch) chhèng--khì-lâi, chiok chē tông-o̍h lóng ū ka-tī ê bāng-chām. Góa iā tòe liû-hêng, khì chhéng 1 ê kháu-chō lâi pìⁿ. Bô-miâ--ê ná-chhiūⁿ phēng pa̍t-khoán Blog khah chū-iû. Bāng-ia̍h lāi-té chin chē mi̍h-kiāⁿ lóng ū thang kái. Bûn-chiuⁿ lāi-té jī ê tōa-sè to bián kóng, koh ē-sái pàng im-ga̍k, iā ū lâng iōng 1 ê ke-si khì sǹg ū gōa-chē lâng lâi hóng-mn̄g chit ê Blog. Hoâiⁿ-ti̍t chhut-thâu chiok chē. Góa ke̍k-ke ē-hiáu pàng im-ga̍k nā-tiāⁿ. Khêng-si̍t bûn-chiuⁿ siá bô 3 phiⁿ, lóng tòe lâng chhòng hiah-ê ku-lô-pih-sô.

Tāi-ha̍k — WordPress

Tāi-ha̍k ê sî-chūn WordPress chin sî-kiâⁿ, góa iā ū khì chhéng 1 ê kháu-chō. Hit-chūn siūⁿ kóng beh kā chi̍t-kóa kì tòa phō͘-á-chóa, a̍h-sī chhiú-ki-á É-phí-phi(APP) lāi-té ê pit-kì, chò 1 pái sò͘-ūi-hòa. Lâng êng-êng, iáu-sī bú bô sêng.

Chhut Siā-hōe — Medium

Chhut-gōa chia̍h thâu-lō͘, chò tiān-náu--ê put-sî ài chiūⁿ-bāng chhōe chu-liāu, tòe siāng sin ê kī-su̍t. Se̍h se̍h--teh tiāⁿ ē tha̍k tio̍h gâu-lâng he̍k-chiá lāu-sai-hū siá ê bûn-chiuⁿ. Chi̍t-bīn kám-pōe in khóng-khài hun-hióng, chi̍t-bīn iā him-siān in hō͘ chin chē lâng chun-kèng. Bē chió tông-sū iā ū teh Blog siá ka-tī ê kī-su̍t pit-kì. Chiū án-ne, góa mā cháu khì bú 1 ê Medium lâi ké-iáⁿ ka-tī ū pun-tiuⁿ. Put-jî-kò kan-taⁿ siá 2 phiⁿ tio̍h bô āu-hôe--a.

1 ê Tha̍k-chheh-hōe — Blog Ka-tī Tah

Kàu kah 3 tang chêng, góa ê chêng tông-sū Lāu-sîn iau-chhiáⁿ góa lâi tha̍k-chheh-hōe (su-tong-sî iáu m̄ sī “1 ê tha̍k-chheh-hōe”), chŏaⁿ se̍k-sāi hōe-tiúⁿ Soái(Shuai). I lâng chin phok-khiat, chhut-thâu chin chē. I oân-á ū ka-tī ê Blog, koh chin chia̍p chhut sin bûn-chiuⁿ. Chú-tê bô chè-hān, ū--ê sī tha̍k-chu sim-tek kám-sióng, ū--ê sī kī-su̍t hun-hióng, iáu ū--ê chin oh-tit hun-lūi. Thiaⁿ kóng i ê Blog sī ka-tī tah ê, góa tio̍h chià chit ê ki-hōe hiòng i chhéng-kàu, mn̄g i che Blog beh án-chóaⁿ khí. Kiat-kó tah hó, a̍h bô 1 phiⁿ khah chèng-keng ê bûn-chiuⁿ, tio̍h khǹg tiàm hia chhī báng.

Chín

Chòe-kīn, Soái hoat-kiàn bāng-chhèng Wiwi hoat-khí BlogBlog tông-lo̍k-hōe, ka-tī chham-ú, mā teh 1 ê tha̍k-chheh-hōe sak tāi-ke chò-hóe siá Blog. Lūn-chin kóng, chit kúi tang góa chin iàu-ì Tâi-gí-bûn ê ho̍k-chín kap chhui-sak. M̄ kam-goān kan-taⁿ teh siā-kûn mûi-thé siá kóa té-té ê pho͘-bûn. Iáu-m̄-koh thêng-tō͘ bô kàu, bô châi-tiāu siá 1 phō chheh. Bat siūⁿ beh siá bûn-chiuⁿ tâu-kó, m̄-koh “kui-mî choân thâu-lō͘, thiⁿ kng bô pòaⁿ-pō͘”. Kì-jiân ū lâng teh chio, góa tio̍h lâi bóng siá, mā kā chìn-chêng chhī báng ê Blog the̍h lâi bóng iōng. Chêng kin-nî 5--goe̍h siá kàu chit-chūn, chit-phiⁿ sī tē-6-phiⁿ lo͘h! Bô tiuⁿ-tî tio̍h án-ne siá beh pòaⁿ-tang--ah, chiaⁿ-si̍t liāu-sióng bē kàu.

---