Sī án-chóaⁿ bô khùn?

這是我的「BlogBlog 同樂會 - 2026 年 9 月」的投稿文章。本月主題是「晚上不睡覺」，由 Jason Lai 主持。如果你有自己的部落格，歡迎一起來參加！

Sī án-chóaⁿ bô khì khùn?

Bîn-á-chài tio̍h beh pò-kò--a, kán-pò iàu bô 1 ê iáⁿ. Pêng-siông-sî bô êng chhih-chhih, thái ū êng-kang khì chhòng siáⁿ-mih kán-pò. Bô-ta-ôa, kan-taⁿ thang piàⁿ mê-kang…

Sī án-chóaⁿ bô ài khùn?

Sit-thâu chin chē, tāi-chì koat-tēng chò bē liáu. Êng-àm bú kah 11 tiám chiah hā-pan, hiám-á bô chhia-pang thang tńg. Sī kóng chē chhia tńg--khì koh ài tiám-pòaⁿ-cheng. Keh-tǹg-kang chái-khí oân-á tio̍h siōng-pan. Chi̍t-sut-á chhoán-khùi ê sî-kan to bô, jú siūⁿ sī jú tū-lān. Kui-sì pòaⁿ-mê mài khùn, chiah khan-thōa kóng, lâng teh phòa-pēⁿ bô sóng-khoài, chhéng-kà hioh-khùn hó--a.

Sī án-chóaⁿ bô beh khùn?

Hàn-tit ū ki-hōe hâm chek-peh sió-mōe ê lâm-pêng-iú khai-káng. Bô kóng m̄ chai, kóng chiah chai-iáⁿ i mā bat sńg kòe Maplestory, hit-ê goán sè-hàn-sî siāng ài ê áng-láiⁿ giàn-m̄(online game). Jī-chhiáⁿ koh kài phú-lo͘h. Lâng iáu tī 2, 30 kip teh thoa-bôa, i chá tio̍h liān kah pah-jī kip chò giàn-m̄ lāi-tè ê thâu-lâng! Giàn-m̄ ê chí-ín-chheh i sī ta̍k kî to ū bé, chiⁿ kah kui ê chheh-tû-á. Tī ha̍k-hāu koh ē-tit chò tông-o̍h ê sian-siⁿ, kà in án-chóaⁿ ī khah khoài seng-kip. Bô tiuⁿ-tî káng-káng--teh tio̍h saⁿ-keⁿ pòaⁿ-mê--lioh!

Sī án-chóaⁿ bô teh khùn?

Thàu-chá 5 tiám pòaⁿ, a-pâ cheng-sîn--ah. M̄ chai án-chóaⁿ, kui-mê the tòa bîn-chhn̂g, soah bô hoat-tō͘ lo̍h-bîn. A-pâ sé-bīn sé-chhùi liáu, ji̍p--lâi pâng-keng, kiâⁿ kàu góa ê piⁿ--ê, liàm 2 ē chhùi-phóe, so chi̍t-ē-á thâu-khak. Sòa--lo̍h, a-pâ tio̍h án-ne chhut-mn̂g, chē thâu pang ê chia̍t-ūn, siong-pan khì--a.

---